Engelberg 200 Jaar bi Obwalde

Gedicht von Ida Knobel-Gabriel, Wolfenschiessen.

(Diskussion aus dem März-Stamm 2018)

Nidwaldner und Obwaldner sind nid die gleyche Leyt D Abschtammig seyg verschide, säb schadti ja zwar neyd. Allemanne seygid beed Schtämm, aber äbe neyd verwandt, drum seyg s Verhältnis mäini 2000 Jaar scho gschpannt.

D Obwaldner sind bedächtig, die handlid nid so gschwind d Nidwaldner dänki gflingger, – nid will si schleewer sind, nänäi nur chley schpontaner, tiends eppe äinisch truie hend mäischtens d Naase z vorderscht (und sind sich nacher gruie)

d Räisseckler machid gääre uber d Schifeler fuili Schpriich! d Obwaldner hirnid lenger oder bhaltid d Schpriich fir siich d Obwaldner uberleggid si äinisch scho chley z lang Nur hends de ändlichd Leesing, sind s de am lengere Schtrang

De gids nu Ängelbärger nu äinisch ander Leyt Vo allne Seyte hend si chley eppis mit der Zeyt. Nateyrlich zerscht vom Chloschter, sogar Habsburger Geen

doch nid all gand is Chloschter vo  dene Grafe-Seen sum hend e Frai mitbrunge, so heds  aagfange hie oder e Nidwaldneri  gfunde, e Hibschi, wäisch ja nie Imene Alte Buech isch  s gschtande ,e Schtanser häig das gschribe,   uber d Hibschi und dr säb dr mäind, das seyg bis hit soo blibe ?

Mee hibschi feyni Maitli, chenn me z Nidwalde gsee aber flottti schtrammi Burschte, gäbs de z Obwalde mee Doch wenn die zäme chäämid, de gääb das scheeeni Chind! und schlai gääbs, wenn es helftig nu Ängelbärger sind.

Nidwaldner und Obwaldner, sid jee i beedne Täler hend underem Schtrich nateyrlich beed eppe gleych vill Fääler iigschlosse d Ängelbärger eys gleych die liebschte  Frind ai wenn sie etz Gotts Name scho lang Obwaldner sind.

Uf all Fäll gued isch d Mischig, wenns zämeschpanne tiend und mitenand äi richtig, am gleyche Hälslig ziend.

Dr Napoleon isch d Schuld gsi, dä hätt hie neyd verloore d Nidwaldnder, hend nateyrlich wider äinisch d Naase voore Nidwalde isch verblieted bim franzose Uberfall, d Obwaldner hend si schtille, was schleewer isch duezmal

Politisch nid grad äifach, muess s Läbe weyter gaa. Nur wäg dem Chriegsdebakel isch drum das Gschpett z verschtaa Sie häigid nid vill gleerd druis, gley bruichds wider d Waffe bis das schterisch Halbkanteendli s i SchtaateBund tued schaffe.

d Obwaldnder sind paraad gsi, Ängelbärg z ubernää hättid doch ai d Nidwaldner, chley gleyner nache gää Wäärid si zämegsässe bi m ene  guete Glesli Wey wäärid si nie ververchrached….. Er seyg ne z teyre gsey.

Was gid es de da z feyre? hed sich drum mänge gfragt das isch ja mee es Jaarzig,  hends sum nu  z deyte gwagt. s Aadänke isch zwischpältig, zwäihundert jaar dernaa aber d Ängelbärger kennt me: zum fäschte äister z haa:

„S gid ämu Leyt da uife!“ hends gmäind, we vor fifzg Jaare. und gherid s du bim Bütsche: s häissst Schpaare! Schpaare? schpaare!

Fakt isch dass d Engelbärger, etz zu Obwalde gheerid und nur nu so nach Waale sich chley  dergäge weerid. Im Härz ganz z innerscht inne hends mängisch Langizeyt aber bedächtig, we Obwaldner sägid si gscheyder neyd.

Was chiflid si de hit nu, die beede Halbkanteen? s isch oberhalb  we underhalb em Chärnwald  äifach scheen. Nidwalde hed mee Aaschtoss am Vierwaldschtetter See

aber wächsig grieni Matte ,und demsgmäss firnäms Vee hend scho d Obwaldner mäini, und nu e Trumpf derzue mit Ängelbärg nateyrli, das schläckt äwäg käi Chue.

Die bescht Milchchue nateyrlich, die isch z Nidwaalde blibe si wird im Summer und im Winter uf Triebsee-Titlis tribe. dett laifd sie de uf Redli, gaad sogar z ringelum, un laift und laift sid Jaare, s laift… sälte eppis chrumm vom Drum und dra drumume, cha Ängelbärg vill gniesse.

d Rändidte vo de Bahne versteyrids z Wolfeschiesse

So simmer beed doch z fride, z Ängelbärg, z Wolfeschiesse der Vercheer dur d Derfer dure, wird me erträge miesse

Frindschaft kennt käini Gränze, und d Liebi sowisoo dr Brueder Chlais isch Heilig z Obwalde uise choo und trotzdem sind d Nidwaldner mit iim ganz nooch verwandt mit samt de Ängelbärger,  das isch nur eys bekannt.

d Obwaldner wends nid wisse , wäg dem ischs gleych esoo nid z letscht dank seyner Muetter isch äär soo uisecho. und die hed drum sey Vater scheyns z Alzelle hinne gfragt und mit vill Gottvertruie hend si die „Misch-Eh“ zäme gwagt.

Zwee Techtere sind  schpeeter  ghirate z Wolfeschiesse und hit nu derfid  zahlreych  d  Ur-Ur-Ur-Grosschind  griesse. Ja d Liebi und der Fride sind s bescht Fundamänt

drum gänd mier eys hit gääre und friedlich äifach d Händ.

Schreibe einen Kommentar

This site uses Akismet to reduce spam. Learn how your comment data is processed.

Feedback